ಮಣ್ಣಿಗಾದರು ಇಡಲಿ
ಬೆಂಕಿಗಾದರು ಕೊಡಲಿ
ಬಿಟ್ಟು ಬಿಡಿ
ಅವರ ಪಾಡಿಗವರನು !

ಮಣ್ಣ ಕೆದುಕದಿರಿ
ಬೂದಿ ಎರಚದಿರಿ
ಬದುಕಲು ಬಿಡಿ
ಸತ್ತವನನು !

ಸಾಕು 

ಕವಿತೆ ಬಾಳಲು ಹತ್ತಾರು
 ಸಹೃದಯಿಗಳು ಬೇಕು !
ಕವಿ ಬದುಕಲು ಒಂದಿಬ್ಬರು 
ಹುಂಬ ಗೆಳೆಯರು ಸಾಕು !

ಇನ್ನೊಂದು ಪೆಗ್ಗು 

ಹಾರಾಡದೆ ಚೀರಾಡದೆ
ನಿಧಾನವಾಗಿ ಎಲ್ಲದಕ್ಕೂ
ಒಗ್ಗು
ತಡಿ ಬೆರೆಸುವೆ
ಇನ್ನೊಂದು
ಪೆಗ್ಗು !

ಹುಡುಕಾಟದ ಹುಡುಗಿ 

ಕವಿತೆಯ ಬರೆದೆ ಗೆಳತಿ

ನನ್ನಂತರಾಳದ ಒಡತಿ 

ಬರೆಯಲು ನಿಲುಕದ 

ಆ ಭಾವನೆಗಳ 

ಬಗೆದು ಬಸಿಯುವ 

ದುಸ್ಸಾಹಸದಲಿ 

ಆ ನಗುವನು ಹೋಲಿಸೆ 

ಹುಡುಕಾಡಿದ ಉಪಮೆಗಳಲಿ 

ನೀ  ಸಿಕ್ಕೋ ಇಲ್ಲೋ ?

ಸಿಕ್ಕಾಗ ನಿಂತು 

ಮತ್ತೋಡಿದೆಲ್ಲೋ ?

ಮತ್ಸಿಗುವುದೆಲ್ಲೋ ಗೆಳತಿ 

ನನ್ನೀ ಹುಡುಕಾಟದ 

ಒಡತಿ !!!

ನೆನಪಿನಂಗಳ 

ನೆನಪಿನಾ ಅಂಗಳದಿ
ನಿಂತೆ ನಾ ಒಂದುದಿನ
ಎಷ್ಟು ಚಂದವಿತ್ತು
ಆ ನೋಟ !

ಚೀರಾಡಿ ಹಾರಾಡಿ
ಬಿದ್ದು ಎಳೆದಾಡಿ
ಆಡಿದ್ದ ಕಬಡ್ಡಿಯಾಟ !

ಆತುರದಿ ಮರವೇರಿ
ಬಿದ್ದು ಕೈ ಮುರಿದರೂ
ಮತ್ತೆಯಾಡುತ್ತಿದ್ದ
ಮರಕೋತಿಯಾಟ !

ಚಾಟಿಯೊಳು ಸುತ್ತಿ
ಕೈಮೇಲಕೆತ್ತಿ
 ರಪ್ಪನೆ ಒಗೆದಾಡಿಸುತ್ತಿದ್ದ
ರಂಗಿನಾ ಬುಗರಿಯಾಟ !

ಬೀದಿಬೀದಿಯೊಳು
ಬಾಲೆಯರು ಆಡುತ್ತಿದ್ದ
ಕುಂಟೆ ಬಿಲ್ಲೆಯಾಟ !

ನಾಮೇಲು ತಾಮೇಲು
ಎನ್ನುವಂತೆ ಹಾರಿಸಿ
ಗೋತಹೊಡೆಯಲು
ಒಳಗೇ ಅತ್ತ
ಗಾಳಿಪಟದಾಟ !

ಗಲ್ಲಿ ಗಲ್ಲಿಗಳಲ್ಲಿ
ಕಾಣಸಿಕ್ಕುತ್ತಿದ್ದ
ಗೋಲಿ ಕ್ರಿಕೆಟ್ಟು
ಕಣ್ಣಾಮುಚ್ಚಾಲೆ ಯಾಟ !

ಎಲ್ಲವೂ ಬಂದಿತ್ತು
ಅಂಗಳಕೆ ಅಂದು !
ಹುಡುಕಿದರೂ ಕಾಣದು
ಆ ನೋಟ ಇಂದು !!!

ರೈತ  ಮತ್ತು  ಕುಣಿಕೆ !

ಒಂದು ಹದ ಮಳೆ ಹೊಯ್ದ ಬೆನ್ನಲೇ
ಹೂಡುವನು ರೈತ ನೇಗಿಲನು
ಗೇಯುವೆನು ನೆಲವ ತದೇಕಚಿತ್ತದಲಿ
ಮುಂದೊಂದು ದಿನದ ಹಸಿರು
ಸುಳಿದಾಡಲು ಕಣ್ಮನಗಳಲಿ !

ಮಳೆಬಾರದಿದ್ದರೆ ? ನೆಲಅರಳದಿದ್ದರೆ ?
ಆದರೆ ಹೋದರೆಂದು ಚಿಂತಿಸದೆ
ಹೂಡುವನು ನೇಗಿಲನು
ಬೆವರ  ಹರಿಸಿ.

ಕಂಗೊಳಿಸೆ ಹಸಿರು
ತೆನೆತೂಗಿಯಾಡಲು
ನಮಿಸುವನು ಜೀವಜಾತೆಗೆ
ಉಣಿಸುವನು ಕುಲ ಕೋಟಿಗೆ !

ಯಾರಮುನಿಸಿಗೋ
ಒಂದೊಮ್ಮೆ  ಅರಳದಿದ್ದರೆ ಹಸಿರು
ಖಾಯುವನು ತಾ ತನ್ನೊಳಗೆ !

ಎಷ್ಟು ಮಳೆಹೊಯ್ದರೂ
ತಣ್ಣಗಾಗದ " ಖಾವು "
ಸುಡುವುದು ಸುತ್ತಲಿನವರನೂ !

ಮಳೆಬಾರದಿದ್ದರೇನಂತೆ
ಅಡಗಲಾರದೆ  ನೋವು ?
ಮರುಗುತಲಿ ಹುಡುಕುವನು
ಕುಣಿಕೆಯನು !

ಒಲುಮೆ 

ಆರದಿರಲಿ ಬಾಳಿನೊಲುಮೆ
ಸ್ವಚ್ಛಂದದ ಚೈತನ್ಯ ಚಿಲುಮೆ
ನುಗ್ಗುತಿರಲಿ ಹೊಸತು ಭಾವ
ಮರೆಸೆ ಜೀವದೆಲ್ಲ ನೋವ !

ಜೇನ ಹೀರುವಾ !

ಬಾ ಬಾರೆ ಮುದ್ದು ಗಿಳಿಯೆ
ಕೂಡಿ ಕುಣಿಯುವ
ಹಾಡಿನಲಿದು ಜೇನ ಮೊಗೆದು
ಬಾನ ಸೇರುವ !

ನಮ್ಮ ನೋಡೆ ನಾಚಿಕೆಯಲಿ
ಚಂದ್ರ ನುಲಿವನು
ದೂರದಿಂದೆ ತಾರೆಗಳವು
ಕಣ್ಣ ಹೊಡೆವುವು !

ಚೆಲ್ವೆ ನೀನು ಚೆಲ್ವ ನಾನು
ಒಲವ ಬಿಟ್ಟು ಭಾಗ್ಯವೇನು ?

ರೆಕ್ಕೆ ಬಡಿದು " ಕಾಲ " ತೊರೆದು
ಮೇಲೆ ಏರುವ
ದೂರ ದೂರ ತೇಲೆ
ಪ್ರೇಮದೂರ ಸೇರುವ !

ತಳಮಳ 


ಏನೋ ತಳಮಳ ಮನದೊಳಗೆ

ಅರ್ಥವಾಗದ ಒಗಟಾಗಿದೆ 

ಇದು ನನಗೆ !

ಎಲ್ಲೋ ಏನೋ ಉದುಗಿದೆ ಆಳದಲಿ 

ಅರಿಯದೆ ಪರಿತಪಿಸುತಿರುವೆ 

ನೋವಿನಲಿ !

ಮರೀಚಿಕೆ 

ಕಾಣದಾನು ಅರಸಿ
ಓಡಿಓಡಿ ಮುಂದಕೆ
ಸವೆದಿವೆ ಪಾದಗಳು
ಬತ್ತಿದೆ ಗಂಟಲು !

ಹೆಜ್ಜೆ ಗುರುತುಗಳು
ಮೂಡುತ್ತಲೇ ಇವೆ
ಕಾದ ಮರಳಿನಲ್ಲಿ
ದಿಕ್ಕೆಟ್ಟಂತೆ !

ಉರಿವ ಬಿಸಿಲಿಗೆ
ಏಲ್ಲವೂ ಕರಗುತಿದೆ
ಸ್ಪಷ್ಟವಾಗುತ್ತಿದೆ
ಬಿಸಿಲುಗುದುರೆ !

ಕಾಣದಿದ್ದರೂ ಸರಿಯೇ
ಅರಸಿ ಹೊರಟದ್ದು
ಸಿಗಲಿ ಸಾಕು
ಮರೀಚಿಕೆ !