ಧೂಮಕವನ 
ಸೇದುವವರು  
ಸೇದಿ ಸೇದಿ  ಹಾಳಾಗಿ !
ಸೇದದವರು 
' ಧೂಮಕವನಕ್ಕೆ '
ಮರುಳಾಗಿ !

ಓದಬಾರದು 
ಹೆಣ್ಣು ಮಕ್ಕಳನ್ನು ಗೋಳಾಡಿಸಬಾರದು 
ಕುಡಿದುವಾಹನ ಚಲಾಯಿಸಬಾರದು 
ಜನನಿಬಿಡೆಯಲ್ಲಿ ಸಿಗರೇಟು ಸೇದಬಾರದು 
ಈ ಮೇಲಿನ ಯಾವುದನ್ನೂ ಮಾಡದವರು 
ಈ ಕೆಳಗಿನ ಪದ್ಯಗಳನ್ನು ಓದಬಾರದು !

ವ್ಯವಸ್ಥೆ 

ನಾನು ವ್ಯವಸ್ಥೆಯನ್ನು ಸುಡಲಾಗದ 
ಅಸಹಾಯಕತೆಗೆ ಸಿಗರೇಟು ಸುಡುತ್ತೇನೆ 
ಮತ್ತು ನಾನೂ (ಆ) ವ್ಯವಸ್ಥೆಯಾಗುತ್ತೇನೆ !

ಕೆಲವರು 

ಕೆಲವರು 
ಒಳಗೊಳಗೆ ಸುಡುವುದಕ್ಕೆ 
ಯಾರಿಗೂ ಹೇಳಲಾಗದಕ್ಕೆ 
ಏನೂ ಮಾಡಲಾಗದಕ್ಕೆ 
ಸಿಗರೇಟು ಸೇದುತ್ತಾರೆ !
ಮತ್ತೆ 
ಕೆಲವರು ಹೋಮ 
ಮಾಡುತ್ತಾರೆ !!!

ಕೆಂಡ  ಮತ್ತು ಹೊಗೆ 

ಸಿಗರೇಟನ್ನು ಬೈಯ್ಯುತ್ತಲೇ 
ಹೊತ್ತಿಸಿಕೊಂಡ ಗೆಳೆಯ 
ಹಲವರಲ್ಲಿ ಆಲೋಚನೆಯ 
ಕಿಡಿಹೊತ್ತಿಸುತ್ತಿದ್ದ !
ಆದರೆ 
ಆಲೋಚನೆಕಿಡಿ 
ಉರಿವಬೆಂಕಿಯಾಗದೆ 
ಕೆಂಡವಾಗಿ ಹೊಗೆ ಮಾತ್ರ 
ಆಡುತ್ತಿತ್ತು !!!

ದರ್ಶನ 

ದರ್ಶನ ವಿಧಿಸಿದ ಎಚ್ಚರಿಕೆ 
"ಧೂಮಕವನ  ಆರೋಗ್ಯಕ್ಕೆ ಹಾನಿಕಾರಕ" !
ಆದರೆ ಇದರಿಂದ ಸಾವು ನೋವು 
ಖಂಡಿತ ಸಂಭವಿಸುವುದಿಲ್ಲ !!!

ಧೂಮಪಾನ 

ಸೇದದವರು ಬಿಟ್ಟುಬಿಡಿ ಎನ್ನುವುದು 
ಅಸೂಯೆಯಿಂದ !
ಸೇದಿ ಬಿಟ್ಟವರು ಬಿಡಿಸಲುಯತ್ನಿಸುವುದು 
ಮತ್ಸರದಿಂದ !!!

ಗೀಟು 

ಧೂಮಪಾನ ಘಾಟು 
ಅದಕ್ಕೇ ಎಳೆವುದು
'ದ' ಕ್ಕೆ  ಗೀಟು !

ಭೈರಾಗಿ 

ಭೈರಾಗಿಗಳು ಭಂಗಿ ಹೊಡೆದು 
ಶಿವನ ಕಾಣುವರು !
ನಮ್ಮ ನಿಮ್ಮಂಥವರು ತೆಗಳಿ 
ಮತ್ತೊಂದನು ಹಚ್ಚುವೆವು !!!

ಘಾಟು 

ಭಾರೀ ಘಾಟು ಸಿಗರೇಟು 
ಅದಕೆಂದೇ ನಾ ಹೊಗೆಯನು 
ಹೊರಬಿಡುವುದು !

ಸುತ್ತಮುತ್ತಲಿನ ಪುಕ್ಕಟ್ಟೆಯವರು 
ಸುಮ್ಮನೆ ಹಾಗೂ ಹೀಗೂ 
ಕೆಮ್ಮುವರು !

ಪಟಾಕಿ ಹೊಡೆದರೂ 
ಸಿಗರೇಟು ಹೊಡೆದರೂ 
ದುಡ್ಡು ಸುಡುತ್ತೀಯ
ಎನ್ನುವರು !

ತಾವೂ ಏಕಾಂತದಲಿ 
ಬೆರಳುಗಳಲಿ ಸಿಗರೇಟನಿಟ್ಟ 
ಪೋಸು ಕೊಟ್ಟು ಕೊಳ್ಳುವರು !
ಮತ್ತು 
ಈ ಪದ್ಯ ಓದಿದಾಗಲೆಲ್ಲ 
ಮನಸಲ್ಲೇ ಕಡ್ಡಿಗೀರಿ 
ಹೊಗೆಯಲ್ಲಿ ಸಿಕ್ಕು  
ಖೆಮ್ಮುವರು !!!